Selið á Stokkalæk auglýsir nú eftir umsóknum um dvalarstyrki á árinu 2012. Með dvalarstyrkjum er átt við endurgjaldslaus afnot af Selinu tiltekinn tíma til kennslu eða æfinga- og tónleikahalds. Umsóknir skulu hafa borist fyrir 1. febrúar næstkomandi. Sótt er um á heimasíðunni stokkalækur.is undir flipanum Styrkir og bókanir. Á heimasíðunni er einnig að finna upplýsingar um aðstæður í Selinu.

 Á árinu 2012 verður úthlutun dvalarstyrkja þannig:

1. Fimm dvalarstyrki fá tónlistarmenn eða tónlistarkennarar í því skyni að halda masterklassa í Selinu.
2. Fimm dvalarstyrki fá tónlistarmenn til æfinga- og tónleikahalds í Selinu. Þessir styrkir verða einkum veittir ungum tónlistarmönnum, sem eru að hefja feril sinn sem atvinnumenn í klassískri tónlist.

 Þeir sem ekki fá dvalarstyrki í Selinu á Stokkalæk að þessu sinni geta engu að síður átt þess kost að fá staðinn til afnota í samræmi við óskir sínar. Þurfa þeir að láta þann vilja sinn koma fram í umsókn um dvalarstyrk. Um gjaldtöku fer þá samkvæmt gjaldskrá sem birt er á heimasíðunni undir flipanum Gjaldskrá.

 Umsækjendum er bent á að skoða dagatal á forsíðu heimasíðunnar áður en þeir senda inn umsóknir því að nú þegar eru nokkrir dagar á árinu bókaðir (merktir með bláu).

Sérstök athygli er vakin á því að Menningarráð Suðurlands hefur auglýst eftir umsóknum um verkefnastyrki með umsóknarfresti til og með 11. febrúar 2012, sjá nánar heimasíðu ráðsins, sunnanmenning.is

 Frá því Selið á Stokkalæk tók til starfa 4. júlí 2009 hafa verið haldnir 88 tónleikar og 15 masterklassar. Þá hafa tónlistarmenn verið þar til æfinga í 65 skipti, í lengri eða skemmri tíma eftir atvikum. Þrjár CD upptökur hafa farið fram í Selinu og í 22 skipti hefur staðurinn verið leigður út til annarra en tónlistarmanna.

Stokkalæk, 4. janúar 2012, 

Inga Ásta og Pétur Hafstein

Einstaklingar, félagasamtök, fyrirtæki, stofnanir og sveitarfélög á Suðurlandi geta sótt um
styrki en skilyrði er að umsækjendur sýni fram á mótframlag. Heimilt er að
sækja um styrk til verkefna sem umsækjandi er þegar byrjaður að vinna í.

Menningarráð Suðurlands efur ákveðið að árið 2012 hafi þau verkefni forgang sem uppfylla eitt eða
fleiri eftirtalinna atriða:

1.Samstarf milli tveggja eða fleiri aðila, byggðarlaga eða listgreina og uppsetning
viðburða á fleiri en einum stað.

2.Verkefni sem efla nýsköpun tengd menningu.

3.Verkefni sem stuðla beint að fjölgun atvinnutækifæra.

4.Verkefni sem styðja við menningartengda ferðaþjónustu.

5.Verkefni sem draga fram staðbundin eða svæðisbundin menningareinkenni eða menningararf.

Menningarráðið mun hvorki veita rekstrar-, stofnkostnaðar- né endurbótastyrki. Ekki verður heldur styrkt
skráning á menningarminjum, starfsemi íþróttafélaga, bæjarhátíðir, almennar samkomur, safnaðarstarf og hefðbundið menningarstarf innan skóla.

Umsóknarfrestur er til og með 11. febrúar 2012.

Ætlunin er að tilkynna um úthlutun fyrir páska 2012.

Umsóknum skal skilað til Menningarráðs Suðurlands á þar til gerðum eyðublöðum sem hægt
er að nálgast á heimasíðu Menningarráðs www.sunnanmenning.is. Allar nánari upplýsingar veitir Dorothee Lubecki,
menningarfulltrúi Suðurlands, í síma 480-8207, 896-7511 eða með tölvupósti Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. .

Menningarfulltrúi verður til viðtals í öllum sveitarfélögum

Umsóknir skal senda, í tölvupósti á Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það.

Gerðar hafa verið þær breytingar á úthlutunum styrkja til félaga, samtaka og einstaklinga á þann veg að Alþingi hættir úthlutunum á
styrkjum til ýmissa verkefna til félaga, samtaka og einstaklinga eins og verið hefur. Alþingi mun áfram ákvarða umfang styrkja til einstakra málaflokka
en úthlutun þeirra mun flytjast til ráðuneyta, lögbundinna sjóða, menningarráða landshluta eða annarra sem sjá um og bera ábyrgð á viðkomandi málaflokkum.
Þessar breytingar taka gildi við úthlutun á safnliðum á fjárlögum fyrir árið 2012. Umsóknin um fverður því ekki tekin til afgreiðslu hjá fjárlaganefnd.

Ráðuneytin munu einungis úthluta styrkjum til verkefna sem falla undir málefnasvið þeirra að svo miklu leyti sem þau falla ekki undir
lögbundna sjóði eða samninga, svo sem menningarsamninga eða vaxtarsamninga. Því er mikilvægt að umsækjendur kynni sér vel hvaða ráðuneyti ber ábyrgð á þeim
málaflokki sem verkefni umsækjanda um styrk fellur undir.

Vakin er athygli á því að umsóknarfrestur ráðuneytanna er til 2. desember og úthlutað er einu sinni á ári eða eigi síðar en 31. janúar ár hvert.

Verkefni eftir ráðuneytum

Mennta- og menningarmálaráðuneyti.

• Styrkir á sviði listgreina.
• Veitt eru framlög til félagasamtaka og annarra aðila sem starfa á sviði lista og eru ekki aðilar að menningarsamningum né hafa aðgang að sjóðum.
• Styrkir á sviði menningararfs.
• Veitt eru framlög til félagasamtaka og annarra aðila sem starfa að varðveislu menningarminja og eru ekki aðilar að menningarsamningum né
  hafa aðgang að sjóðum.
• Styrkir á sviði íþrótta- og æskulýðsmála.
• Veitt eru framlög til félagasamtaka og annarra aðila sem við íþrótta- og æskulýðsmál, skólabúðir o.fl., og hafa ekki aðgang að sjóðum á þessu sviði.
• Styrkir til uppbyggingar landsmótsstaða.
• Veitt eru framlög til að styðja við uppbyggingu á landsmótssvæðum í samstarfi við sveitarfélög og fleiri aðila.

Sjávarútvegs- og landbúnaðarráðuneyti.

• Stuðningur við áhugahópa og faglegt starf.
• Veittir eru styrkir til að styðja við aðila utan ríkisstofnana sem starfa á verkefnasviði sjávarútvegs- og landbúnaðarráðuneytis og njóta ekki framlaga á fjárlögum.

Velferðarráðuneyti.

• Styrkir til félagasamtaka.
• Veittir eru styrkir til félagasamtaka sem starfa á verkefnasviði ráðuneytisins og njóta ekki framlaga á fjárlögum.
• Verkefnastyrkir á sviði velferðarmála.
• Veittir eru styrkir til félagasamtaka til að hrinda í framkvæmd verkefnum og aðgerðum sem falla að verkefnasviði ráðuneytisins og njóta ekki framlaga á fjárlögum.

Umhverfisráðuneyti.

• Verkefnastyrkir á sviði umhverfismála.
• Veittir eru styrkir til faglegrar uppbyggingar á sviði umhverfismála með því að styrkja tiltekin verkefni. Einnig eru veittir styrkir sem stuðla að þátttöku í stefnumarkandi alþjóðlegum ráðstefnum og fundum um umhverfismál, einkum þeim sem ráðuneytið sjálft hefur aðkomu að. Ráðuneytið mun á árinu 2012 leggja áherslu á verkefni á sviði umhverfis- og náttúruverndar.
• Styrkir til frjálsra félagasamtaka.
• Veittir eru rekstrarstyrkir til frjálsra félagasamtaka á sviði umhverfismála og til að stuðla að opnum og frjálsum skoðanaskiptum um umhverfismál og til að efla almenna vitund um gildi umhverfis- og
  náttúruverndar.

Nánari upplýsingar um úthlutunarreglur og eyðublöð er að finna hjá menntaog menningarmálaráðuneyti, hjá sjávarútvegs- og landbúnaðarráðuneyti, hjá umhverfisráðuneyti
og hjá velferðarráðuneyti.

Um helgina verður í fjórða skipti efnt til Safnahelgar á Suðurlandi. Um 70 þátttakendur bjóða upp á fjölmarga viðburði yfir helgina og er svæðið enn að stækka því í fyrsta skipti taka aðilar á Höfn þátt í helginni með margvíslega dagskrá. Vestmannaeyingar verða með enn meiri dagskrá en oft áður og ber helgin þar yfirskriftina „Langa safnahelgin í Eyjum“. Það er ljóst að það er mikill kraftur í safnastarfinu sem og öllu menningarlífinu á Suðurlandi, enda hefur öllum verið boðin þátttaka sem óskað hafa eftir því og sérstaklega voru kaffi- og veitingarstaðir sem og lista- og handverskfólk hvatt
til þátttöku.

Opnunarhátíð helgarinnar verður hátíðleg eins og ævinlega en að þessu sinni verður hún í Sögusetrinu á Hvolsvelli, fimmtudaginn 3. nóvember. Hátíðin hefst klukkan 16:30 og verður boðið upp á tónlistaratriði auk þess sem flutt verða stutt ávörp. Menningarfulltrúi Suðurlands, Dorothee Lubecki mun síðan formlega opna safnahelgina, en Dorothee hefur annast framkvæmdastjórn helgarinnar síðastliðin þrjú ár.

Dagskrá safnahelgar er hægt að nálgast hér hægra megin á síðunni og á vef flestra sveitarfélaga á Suðurlandi.

Það eru Samtök safna á Suðurlandi með dyggri aðstoð Menningarráðs Suðurlands sem standa að helginni og er það von okkar í samtökunum að íbúar og gestir fari sem víðast að njóta þess sem í boði er um helgina.